أنا فلاح
**********
أنا فلاح ومهنتى فلاح
ومش عيب
إن أقول أنا فلاح
بزرع الزرعه وبسهر عليها
لجل إبن بلدى مايرتاح
ولجل ماأشوف الإبتسامه
فوق الشفايف مسا وصباح
********
أنا فلاح
وأصلى نبته من الصبار
وأوقات بتمر عليا أيام
ملقيش تمن صفيحة السولار
وأبيع من قوت عيالى
وساعات أستلف من الجار
وأشتغل باليوميه
وأتحزم بلاوية قش ملويه
وأروح بيتى أخر النهار
ألاقى أم العيال عملالى
كام قبورى وطبق ملوخيه
أتعشا وأصلى وأحمد ربنا
والحمد لله
مستوره ولا عمرى جوعت
ولا عمر مصر يوم جاعت
ولا عمرها يوم هتجوع
وإللى يقول غير كده
يبقا إنسان قليل الأصل
وأقوله إسأل أبوك
فى حرب اليمن والجزائر
وفلسطين وتحرير الكويت
مات منها كااااااام شهيد
علشان تنول الإستقلال
ويطلع عليك فجر جديد
مصر طول عمرها شيله الهم
جاى النهارده
ياإبن النهارده
تساوى فلوسك ياعويل بالدم
وتقول مصر جاعت
وأنا بقولك
مصر لا عمرها جاعت
ولا عمرها يوم هتجوع
مصر هتفضل للأبد وردايه
مفتحه في كل الربوع
وأنا فلاح ومهنتى فلاح
ومش عيب
إن أقول أنا فلاح
وهروى زرعتى بدمى
وهقف جنب بلدى
وجنب جيش بلدى
لو حتى هموت م الجوع
*********
أنا فلاح
بقلم الشاعر يوسف الحمله
30/4/2015
الصوره لصديقي الغالي الفنان المتألق محمد يحي
من فيلم صنع في الصين
ليست هناك تعليقات:
إرسال تعليق