ليه يا قلم عاصينى
ف حائل بينك وبينى
يعني يبقي الالم كاوينى
وانت رافض تشتريني
عارف يا قلم
رغم انك تشبه للصنم
لكنك حاسس بالألم
اول ما ايدي تلمسك
الجرح فيا بيهمسك
ويطول ما بينكم القصص
وكأنكم جوزين حرس
واقفين ع باب الوجع
واحد عمال يشتكي
والتاني بيصغيله السمع
والقلب عامل ممتنع
لانه مليان كتير
فيه اللي يفوق المدى
لو حاول إنه يبوح
هيشمت فيه كل العدا
بقي لا يشكي ولا ينوح
وراضي بحالته كدة
رغم إنى أنا متأكدة
إنه عايش حلاوة روح
ساكت جدا
ومن جواه ميت مدبوح
الفكر شارد في الفضا
متعلق في حبل الرضا
متشتت في مليون اتجاه
ولو ينادى يرجعله صدى
عشان تنول النجاة
خليك بس مع الاله
كل اللي فاتوه خسرانين
رغم بدنيتهم اتكلفتوا
لساهم برضه عراينين
ما تقول ليا يا قلم
خليك صريح زي العلم
عمره ما اتنكس الا إذا
عشان يعلن حالة حداد
لو فاكر كلامك هيجيب زعل
ده سكوتك أساس الملل
هيصيبني قريب بالشلل
اكتب وإخلص وأجيبلك مداد
وعبر عن مشاعر جداد
نابتين في القلب الخلا
بطل بقي شغل العناد
زهقت دورك فى المهزلة
كومبارس صامت مستمع
ورغم انك مجرد قلم
حاسسنى أكتر من العباد
انطق و ثور
انت بقيت أخر أمل
بقيت بفضفض بس ليك
والوضع غير محتمل
أقصف بقى سن السكوت
ويا تنفجر ؛ يا روح وغور
مش عاوزة ليك أي صوت
يا ديب في صورة حمل
ومش راح أسألك ايه العمل
وهكمل توهتي في الملكوت
بقلم / سعاد قنديل
ليست هناك تعليقات:
إرسال تعليق