( مشهد فى حلم )
************
حتى كامل أشوفه فى الحلم
مقدم برامج تليفزيون
ياللا ٠٠٠٠٠٠٠٠٠
ماهوكل شئ بقىَ بيهون
الحب بقى بيهون
والعشق بقى بيهون
والوعود والعهود
بقت كمان بتهون
جات على كامل
أشوفه فى الحلم
مقدم برامج تليفزيون
أيه دلوقتى بحياتنا من غير تمن ؟
مين دلوقتى خالى من الشجن ؟
لا الأيام ولا الحكام بيرحمو
ولا حتى الزمن
وعلى كل حال
غِلى التمن رِخص التمن
أدينا عايشين زى العايشين
جات اللقمه بحلال أكلنها
وحمدنا ربنا
وان مجتش ع الورق رسمناها
وصَبرنا بطننا
مش ده صحيح ياولاد
أنا مابقص حكايات
ماهو أصل الزمن إتغير
وعصر الكوز السكر فات
عصر الكوز السكر
مين إللي فاكر عصره
لما الست كانت بتروح السوق
وفى جيوبها شوية ملليمات
وترجع جايبه معاها كل الحاجات
أما ياعينى على دلوقتى
الورقه أم خمسين
والورقه أم ميه
والورقه أم ميتين
لا بقت بتجيب نص الحاجات
ولاملابس أطفال ولا حفضات
وعشان العيشه تبقىَ هنيه
والست تحس بقىَ بحنيه
لازم دلوقتى تروح السوق
وفى جيبوبها كاااااام ورقه بميه
وأبو العيال عمال بيولول
مره يشتغل ويلاقى
واما ميلقيش بيتسول
ماهى العيال كتيره
والإيدين قصيره
والأيام عسيره
والزمن إتحول وإتحول
وإتغير عن الأول ياولاد
مش قلتلكم
عصر الكوز السكر فات
يادى القلوب ويادى العيون
مش مرتاح غير المجنون
لاعارف اليوم من الأمس
ولا الفول من العدس
ولا اللفت من الزيتون
ولا مين بيصون
ولا مين بيخون
وياخساره وألف خساره
ماكل شئ بقىَ بيهون
والحب بقىَ بيهون
والعشق بقىَ بيهون
والوعود والعهود
بقت كمان بتهون
جات على كامل
أشوفه فى الحلم
مقدم برامج تليفزيون
### كامل شخصيه من الواقع وليس من الخيال
وهو إنسان جاهل وصل لأعلى المناصب وأصبح
يتحدث فى كل شئ وهو لا يفقه أى شئ ###
*************
( مشهد فى حلم )
بقلم الشاعر يوسف الحمله
18/4/2015
ليست هناك تعليقات:
إرسال تعليق