مش هلوم بقلـــــم: عــــــادل الشـــــهـــابى

مش هلوم
مش هلوم عليك يا زمن مش هلوم ....
مش هلوم عليك بعد ما كسيتنى الهموم ...
مش هلوم عليك لأنى خلاص مش قادر أقوم ...
زمن ومشيت معاك بضمير ....
كنت بحترم فيك الصغير حتى و الكبير ...
وكنت حاسس إنى فيك طيب وأمير ....
قالوا عليك ملكش يا زمن أمان ...
قولت أنا لا ده الزمن إنسان ...
بصولى وضحكوا عليا ...
وقالوا خليك عايش فى أحلام وهميه ..
أحلام لا هى رايحه ولا هى جايه ...
يا زمن ليه طبعك غدار ...
وليه العقول معاك دايما تحتار ...
بس مفيش عتاب يا زمن عليك ....
لأنك يا زمن مش شايف بعنيك ....
ولا بتعمل أى حاجه كمان بأديك ...
اللوم على البشر اللى عايشين فيك ...
يا ترى دول بشر ولا ديابه ؟...
وعايشين فى دنيا ولا فى غابه ؟....
ولا يا زمن دى مجرد سحابه ؟....
زمن وغاب فيك الضمير ....
وفيك الصغير بيروح مع الكبير ..
زمن وكل شىء فيك مرسوم ....
ولونك السواد ولوحتك الهموم ....
زمن ودايما تضغط على المظلوم ...
مش هلوم عليك يا زمن مش هلوم ....
بقلـــــم: عــــــادل الشـــــهـــابى