حاجز مياه
قاعد فى ارضى
ايدى على خدى
وترعه ناشفه
عليها ب اعدى
يمكن يصعب عليها حالى
ويصعب عليها كربى
بصت لى بصه
وقالت بودى
اروى شجر النخيل
على شطى
و املا جوفى
ميه و اعدى
ل ارضك و ارض
غيرك انا اسقى
بس السد عالى
و بابه حديد
و قفله مصدى
و حارسه جبان
ياخد ما يدى
و بعد ما كنت بحر
و لي جذرى و مدى
صبحت حفره ومالى
التراب طولى و عرضى
يلا روح ل اخوك
عنده كبسه و مندى
يمكن يعطف عليك
و يمد ايده و يعطى
و سيبنى ل التراب
يردم جوفى وبطنى
و اخلع توبك
و البس توب افندى
و لا اقول لك
حلك و الله عندى
ربى شعرك و البس
توب عزيزه وساندى
و كلامها والله جرحنى
و ضاقت على جسمى عبايتى
رفعت فى الهوا ايدى
و شرعت بقوه عصايتى
و فاسى ع السد
تضرب و تمضى
ضحك شجر النخيل
و العنب لولى
و عنقوده يضوى
بقلم / عصام عشرى العشرى
ليست هناك تعليقات:
إرسال تعليق