قصيدة عامية من الفلكلور الشعبي -
-
قهوة بلدي
------------
أقوم م الصبح أشرب قهوتي
وأقعد على القهوة مع ناسي وعزوتي
مانا خلاص طلعت عالمعاش
وكل أمـــلي أخــدم حتتـــي
دا محمد كان خاطب محروسة
وبيتخانــق علـــى المـــهر
وهى نفسها تبقى عروسة
وكــــريم ده واد مــــدلع
بيشرب سجاير وعمال يولع
وصابر صابر على حزنه
أصل الحكاية في بنته
جــالها مــرض ياقلبي
وتعب ومعرفش يخبي
وشاكر دا دايمآ فــاكر
ان أطيانه لسه معاه
وان فلوسه بس مخصماه
عايش عالذكري ياولدي
غني ولا فقير مش فارقه معاه
ووائل خلص من فترة الجامعة
وودانه ياناس اهي سامعة
على شغل جديد هينوله
ولا شقة جديدة هطوله
والأيام أهـــي دايـــرة
وعالكل هــي هـــاينة
وأبو محمد ياخوفي عليه
بيبنــــي البيت بإديــه
والديانه لسه محوطاه
والكل بيشتغل معــاه
وتيجي هنا تلاقي عبد الواحد
عاشق الغُنا أيام الموالد
وبيجي الصبح هلكان ومتاخد
والكومي ده واكل الدنيا
ماسبش لحد حاجه تانيه
مادخل المجلس ياعنيه
ودخــوله كـــان بإدينــه
والكدب دا حاجه في دمه
واحنا اللي انضحك علينا
آه يادنيا تعبتينا معـــاكي
واحنا دايرين في هواكي
دي الدنيا شكلها ماهتتغير
والناس دي حـــالتها تحــير
ده ساكت وراضي بأبسط عيشه
وده قاعد يحرق نفسه ويولع شيشة
واحــنا كـــدا وعمـــرنا مــاهنتغير
غير بنصبح ونرمي تماسي كتيرة
ســـمعنا ياعــــوض الســت
وبـــلاش تفتـــــح عــالتت
عشان ربك يسترها معانا
ويخـــلي الـــواد والبــت
وأهي دنيا ودايرة علينا
ومحدش حاسس بينا
بكــــرة الأمـــور تتغير
وربنا يفــــرجها علينا
بقلمي (نسرين بدر )
ليست هناك تعليقات:
إرسال تعليق