تاهت الحروف
وسط الظروف
وقف القلم بمسكنه
ما عدش حاجة ممكنه
--------------------------
حتى اللى كان
فى قلبه خوف
اليوم طلع له
قرون خروف
ينطح فى كل الامكنه
-------------------------
وقف القلم
عايز له حبة مُسكِنه
مش لاقى حرف يكتبه
كل الحروف دخلت جحور
الشرطة عاملة اكمنه
--------------------------
كتر الوجع ومفيش دلع
حتى الولد كان يوم جدع
لاحف بنار الشمس
نام ع الارصفه
عايش ببعض الارغفه
-----------------------
ماشى مع الدجال
يعملُه عمل
او حتى يضرب له الودع
يا خسارة
كان فى يوم جدع
----------------------
رجع القلم على الورق
نزف دموعه بمسكنه
اصل الحروف دى مؤلمة
--------------------------
يا تقول حقيقه وتتحبس
يا تنافق الكداب وتاخد امكنه
اصل الحياة بالذل
هيااا ... مزمنه
-----------------
ولا البشر فيهم غجر
ناس بتاكل فى الزبالة
وناس تعلى الارصده
ونقول حياتنا ممكنه
طبعا اكيد ممكنه
---------------------
شوية ضمير ومش كتير
فى كوب مياه
مليان بنصه اتربه
نسقيه شوية للغفير
اصل الفقير
العيشة عند مأندله
----------------------
اما الوزير ياكل فطير
باللحم او بالزبد مشلتته
رجعت ادور ع القلم
لقيته عنده كتير الم
----------------------
شفت الورق
طار منى او حتى اتسرق
والظلم ويا العدل متساويين
فى الحله اتسلق
انا هاتخنق
---------------------
ولقيت فى ركن بعيد
على الرصيف فردة حلق
مكتوب عليها العدل راح
اليوم خلاص هوه اتخنق
عايزين فاروق العدل
واعطيه الحلق-
---------------------
رايات الحق لازم تعود
والحق عمرة ما يتفلق
ويعود قلمنا من جديد
يكتب بعزم من حديد
يكتب على كومة ورق
-------------------------
حروفه اليوم من الرصاص
مش بس كلمة نقول خلاص
لازم نرتب الورق
احنا فى زمن وقت الخلاص
ونعيد نصيبنا اللى اتسرق
--------------------------
بالهمة والعزم الحديد
نعيد حياتنا من جديد
نفسى الامان يرجع يعود
ونشوف امل تحيى العهود
نمشى بامان من غير قلق
---------------------------
اصل الفساد ما عاد يسود
ارهاب دمار ملوش وجود
والجيش معاه احسن جنود
الشرطة بالنفس تجود
نعيش فى امجاد الجدود
ونعيش صباح بيتخلق
--------------------------
يا حكومة رحمة بالفقير
ما عنده حيله وايد قصير
عايش يوماتى على الرغيف
حرام تخليه يتفلق
------------------------
عايزين نعيش مصر زمان
عايزين نعيش فيها الامان
عايزين نزيد فيها العمل
نشغل مكاين والعَجَل
ابنى وابنك نكسبة
ونعيش وننسى يوم ملق
ونسمى بسم الله سوى
قل اعوز برب الفلق
ليست هناك تعليقات:
إرسال تعليق