Essam Dwedar
عفريت
................................................
عفريت الشعر يوم جاني
وقالي اكتب ياصحبي حروف
(مفيش مجني بلا جاني )
(ومفيش صاحب حروف بيموت)
دورت الحسبه دي ف راسي
وقلت عليه عفريت مجنون
مفيش مجني بلا جاني
وايه يعني دا حال الكون
ليه أشغل نفسي وأنا مالي
مادام حال البشر مقلوب
مادمت طبيعي و ف حالي
ليه املى حياتي بس هموم
يغور المجني والجاني
حسابهم عند رب الكون
..................................................
وبعد يومين رجع تاني
ونفس الجمله قالهالي
وطال الزن في وداني
بصوت مسموع في وجداني
دورت الحسبه من تاني
عفريت الشعر قلب حالي
لاقيتني المجني والجاني
وتاهت روحي في مكاني
وشافت عيني ناس بتموت
بيرحل جسمها الدنيا
لكن عايشه وروحها حروف
وشافت عيني ناس تانيه
عايشه بصوت ضمير مكتوم
ماتت روحها او تايهه
عشان عاشت حياتها سكوت
.......................................................
عصام دويدار
ليست هناك تعليقات:
إرسال تعليق