**احنا الكبار**
مين قال كده
هما مين دول الكبار ؟؟؟
ليه الغيوم قدام عنيكم
ليه بتشوفوها معقّده
احنا ابتدينا باقتدار
بتعقّدوها ليه؟؟
واحنا اللى شايلين الأمل
وفرحنا بيه
ودفعنا من دم الغلابه الطيبين
وعيشنا ياما مقهورين
رحلة سنين من عمرنا
شفنا المرار
لكن خلاص خدنا القرار
وعرفنا طعم الانتصار
وعرفنا ايه معنى النهار
ولايوم هنسمح بانهيار
ولا بعودة عهد غار
ولا ظلم يفرض سطوته
ونقول كبار
ولا دين بيكتب فتوته
من جحر فار!!!
الخوف خلاص بلّغ فرار
ونقول كبار
همّا مين همّا الكبار
اللى يبعزق ثروته
فى قلب بار؟؟
ولا بيشعل فى البلد
فتيل دمار؟؟
ولا اللى مغرور بالسيجار؟؟
ولا اللى شايف الغلابه الطيبن
هُمّا الصغار؟؟
احنا الكبار
اللى رفعنا فوق كتافنا
العمار
واللى لوّنّا الصحارى
بالخضار
فالشوارع فالمزارع فالمصانع
حتلاقينا نور ونار
احنا الكتار
احنا الكبار
احنا اللى قدام الفساد
نبنى الجدار
*********
عبدالله ابو النجا
ليست هناك تعليقات:
إرسال تعليق