بقلم /ناصر حافظ " بلاش تعاتب "

يا صاحبي بلاش تعاتب ☆

سألني صاحبي ليه مقصر ☆

من زمان ما سمعنا صوتك ☆

إنت خلاص بطلت تكتب ☆

ولا قلمك استخبي بين سكوتك ☆

ولا مش جايه ف عقلك أي فكره ☆

ولا بطلت الكتابه ف حلم بكره ☆

ولا زعلان ع اللي عدي ☆

ولا خايف م اللي جاي ☆

ولا يومك زي يومي ☆

ضلمه مش لاقيلها ضي ☆

إكتب يا صاحبي اي حاجه ☆

طول ما قلمك لسه حي ☆

رديت بقلبي قبل صوتي ☆

ايه يا صاحبي ما انت عارف ☆

ما احنا يا ما كتير كتبنا ☆

وانت بعنيك كنت شايف ☆

عن صبانا وعن شبابنا ☆

وجرحنا اللي لسه نازف ☆

عن أملنا وعن وجعنا ☆

والكوارث والطرايف ☆

اللي عايش ف الأمان ☆

واللي متشرد وخايف ☆

واللي بكانا وقهرنا ☆

وخلي حبر قلمنا ناشف ☆

رد فعل اللي قرالنا ☆

بس مصمصة الشفايف ☆

الكلام لازم يعلم ☆

في القلوب قبل العقول ☆

والقلوب جوانا ماتت ☆

والعقول عايشه ف زهول ☆

مش هتفهم فكره منك ☆

مهما تشرح أو تقول ☆

يعني يا صاحبي بلاش تعاتب ☆

مهما صمتي معاك يطول ☆

مهما صمتي معاك يطول ☆

بقلم /ناصر حافظ ♡♡