قصيدة صباح الخير
==========
مع كل نسمة وطلعة طير بنقول بهمة صباح الخير
صباح سعيد مع فجر جديد يجعل حياتكو كلها عيد
صباح بورد مع الياسمين وفل ابيض من البساتين
الرزق فيه يفتحه مفتاح ومقسمه ربى الفتاح
الليل بيجى ويا ظلام والنور يشقشق كل نهار
وزمان ده قالوا فى الأمثال الفجر يحيى كل آمال
صباح منور يعنى حياة وتحقيق فى حلم بتتمناه
يعنى ولادة طبيعية وبشرى حلوة وأمنية
عالترعة خضرة وشكل جميل وزقزقة لكتير عصافير
وجريان لمية مع طمى النيل وفلاحين تسعى للخير
وفلاحات لابسة فى جلاليب تغسل حلل وتحلب فى حليب
ويعدى بجاموسته ابو غريب ويقول صباحه لبن وحليب
وفواعلية برضه وصنايعية كله يصبح بتحية
صباحه سالك يا جماعة وبدون لا طفح فى بلاعة
صباح منور بكهارب ونوره من عند الخالق
صباح بتلو كده وكندوز احمر مشفى وزى اللوز
صباحه ناعم بالفارة منشور بفل وبنشارة
وعالقهوة قاعد عبد هادى وصباحنا نادى وزبادى
وتجار فواكه وخضروات صباحنا مانجة كده وتفاح
صباح جديد يعنى تفاؤل وبدون مشاكل ولا تشاؤم
كله بيسعى بكل كفاح ويطلب فى رزقه من الفتاح
كله بيطلب كل الخير صباحكم نادى ومليان خير
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون
ليست هناك تعليقات:
إرسال تعليق