العيد في الريف المصري
فاكره يامه ايام العيد لما كنت بفرح بالجلابيه الكستور
وبلعبه مصنوعه من بلاستيك عباره عن بطه او عصفور
ولما كنت اهرب واجري استخبي بالشجره زي الطيور
وانزل في الترعه وانشر هدومي جنب بيت ام الشعور
فاكره لما كنتي بتجري ورايا كنت بنط من فوق السور
كنتي بتزعقي وتقولي كده تقع يامخفي وتموت وتغور
ولا ساعة المغرب والدنيا بتبقي ظلمه مفهاش اي نور
الدنيا بتبقي ساكته وانتي بتحكي لينا قصة بدر البدور
والشاطر حسن وحكايه الجنيه وحكايه عروسة البحور
و حكيتي عن النار والجنة و وصفتي جمال بنات الحور
وتصحي من الفجريه تحضري الحليب والشاي والفطور
وفي ايام العيد كنتي بتصنعي كعك وبسكويت وبتفور
وكل سنه وانتي طيبه يامه ومع كل وقت بيكي فخور
للشاعر/ مدحت فضل
ليست هناك تعليقات:
إرسال تعليق