مملكة المدخنين
===========
فى كل حتة شمال ويمين تلاقى دايما فى التدخين
فى القطر يعنى وميكروباسات وطيارات وكمان اتوبيسات
وهو ماسك فى سيجارة ويشفط بقوة جبارة
ودخانها يخرج بحرارة ويدخل انوف كل الحارة
وانا ذنبى ايه جارى مدخن يشفط وينفخ ويأفين
اهو هو ده تدخين سلبى يدخل فى صدرى ويخبى
ولما يدخن بشراهة تطلع فى قلبى مليون اهة
ومسكته قيمة وسيما وكأنه عايز تصويرة
فى دنيا تانية كده مبسوط ومزاجه رايق اه ومظبوط
مدمن حقيقى للتدخين وفلوسها اهله محتاجين
ومهما زاد فى السعر كمان يزيد حنينه مع الايام
صدرك مشخلل كده زقازيق ورئتك طبيعى كده بتضيق
ولوقلت ده بلاها سجاير يصاب بأزمة ويتحايل
طب يعنى ارحم اولادك واهل بيتك وحماتك
مستحملينك ومتضايقين من صرف دايم على التدخين
ويقول سعادتى فى سيجارة ودخانها راكب طيارة
وفيروسها يسرى شمال ويمين وتلاقى كله مدخنين
وكانت دى ظاهرة رجالية دلوقت صارت نسائية
عالقهوة كله بيدخن فى شيشة دى حمى ويسخن
ستات وبرضه رجالة والفحمة والعة وشغالة
تفاح ومشمش على مانجة والريحة نغمة فى كمانجة
فى اوروبا بيمنعوا التدخين وبلادنا تشرب فى النيكوتين
ينقوا فى صدورهم بالذات ويصدروا لنا فى السيجارات
فى باقة ضارة ونفسية بتزيد تخلف وامية
ويدمروا دايما فى شباب ظروفه صعبة وحالته هباب
ودى حرب معروفة للجيل وسلاحها هو التدخين
دى افة عامة وحصرية فى كل البلاد العربية
مظهر بيعكس فى حضارة ومظهر يدخن بحرارة
ويقولوا احنا مبسوطين فى مملكتنا للتدخين.
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون
ليست هناك تعليقات:
إرسال تعليق