(صمنا ليه عن حب بينا)
الضمير العربى مات
واللى عايش ع الفتات
راح بيهرب للشتات
كل موجة تشيل تحطه
النهاية بطن حوت
أو جثث فوق م الشطوط
أو نكاية لو نجا
بين بشر كالاخطبوط
كلنا ساهمنا فيهم
للموات
والجدع فينا بمصمص
ف الشفايف
الجدع فينا هايف
آه ياروحى م اللى بينا
حقد قتل بدون ما خوف
احنا يومنا كلام وبس
طل فينا.. قوم وشوف
ثرثرة والكل نايم
فوق سريره شىء مخيف
احنا ودعنا الربيع
واستلمنا اليوم خريف
نبنى قبة ونستخبى
م اللى عايش ع الرصيف
......
كل عضو هاجر من نسيجه
ضل سيره
وانتحب جوا نشيجه
امتى يعرف انه عايش
والامل يبقى عروجه
ليه بنهرب م العروبة
وننسحق بين الغروب
ليه فتحنا الباب لسارق
كان باخطط للحروب
صمنا ليه عن حب بينا
والأسى أصبح حبيب
ليه نودع شمس روحنا
وننطفى ف ايد الغريب
هو لازم حد يغرق
ثم يطفو ع الشطوط
حتى تلقى الحس فينا
نحركه زى الرموت
آه يا نفسى
نفسى لو ما طلعشى روحى
ع اللى ماتوا
تتلاقونى ف التابوت
الشاعر وحيد راغب عضو اتحاد كتاب مصر
ليست هناك تعليقات:
إرسال تعليق