(بتنفخ ف قربة مخرومة )
الشاعر وحيد راغب
رخص الكلام خلاه
بتباع على الأرصفة
زى جذم الصين
فردة شمال والتانية
برده شمال
إلبس وزقط ولمع
كمان القفا
لاطول ولا عرض
ولاحتى ميزان للجمال
إنقع ف برسيل
وغسالتك الأتوماتيك
هاتنضف الأوبال
ورص زى الطوب
بسماعة طبيب ما شفش
ف يوم طب
البانية متزوقة بالكدب
لا رف بين ضلوعك
شال ف يوم كتب
ولا حمل للثقافة بندب
الكترة فيرس بيصحى
لا بموت ولا ينحب
فى لحظة واحدة بينطح
حياتنا يدب
شرينا مصل الوقاية
من روسيا والدنمارك
لا فادنا ..والرط غاية
والحرف أصبح عك
لا نقدر نكون مدارس
ولا على التسول نحيد
البيضة محشورة فينا
مع أننا بنبيض
أكتب وانشر فى فيسك
الفضا مفتوح
الحرف يكتم ف غيظه
وانت البعيد مفضوح
لاجرح الحلاوة خدلك
ولا السحر والدوح
بتنفخ ف قربة مخرومة
واللى انخرم بيروح
من إمتى فاقد الشىء
يبدع جمال وصروح
أتمنى تنزل شوية
من برج عاج الأنا
ويفوت عليك ف غفلتك
الفجر ويا السنا
تصبح تحس إن الأديب
جواه حضارة عجنها
ودخلها فرن الذات
طلعت رغيف ابداع
يقراها كل البشر
أشتات
الكل يقول الله
ويمتع الأسماع
الشاعر وحيد راغب
ليست هناك تعليقات:
إرسال تعليق