عـــم أحمــــد ...بقلـــــــــــــم: عــــــادل الشـــــــــهـــابى

عـــم أحمــــد

عم أحمد راجل بسيط على باب الله ...

عايش بيحمد ربه معاه أو مش معاه ...

بين الناس بطيبته كان محبوب ...

وبعزب كلامه كانت ترق له القلوب ....

عم أحمد كان راجل طيب وجميل ....

مهنته على الرصيف بيبيع مناديل ....

مع مناديله على الرصيف قاعد يدندن مواويل ...

تسمعه وتشوفه تقول غنى ومعاه فلوس كتير ...

بس هو معاه اللى أحسن من الفلوس ...

معاه عزه نفس تسعد كتير نفوس ....

قولت أقرب منه وأتكلم شويه معاه ...

أشوف حلمه قد أيه وأيه مداه ...

لقيت أحلامه سهله وخفيفه ...

منها عاوز يلبس جلبيه نضيفه ...

وعاوز عيشتة تكون شريفه ...

وقالى أستنى علشان ماتنساش ...

حب الناس كنز غالى وعنه ما بستغناش ...

قالى يا بنى عاوز أكون مستور بين الجيران ...

وعاوز أتلم أنا واولادى بين أربع حيطان ...

وفى الشتا ماكونش فى يوم بردان ...

يا بنى الأكل مش هو الموضوع ...

اللى رزقه على الله أبدا مش هيموت من الجوع ..

يا بنى الموت سكه مفيش منها رجوع ...

بيحكى وبتدمع عنيه ...

فى لحظه صعبت نفسه عليه ...

للمناديل قاعد يشكيلها حاله ...

وأزاى بيكافح علشان يربى عياله ...

قال يا بنى مليش وظيفه ....

ومصاريفى بحسبها بالتعريفه ...

ولادى أنا لسه صُغار ...

وطويل عليا المشوار ....

خايف فى يوم أزهق وأنهار ...

الدنيا ومضمنهاش ..

أنا نفسى يكونلى معاش ..

علشان بعد مماتى مراتى الزمن ما يبهدلهاش ..

سألتوا ليه ولادك مش بيسعدوك ...

يتعبوا هما ويريحوك ...

أبتسم وعنيه مليانه دموع ...

وقالى واضح أنك نسيت الموضوع ...

قولتلك ولادى لسه أطفال ...

محرومين من حنان العم والخال ...

ومحدش بيطل عليهم حتى بسؤال ...

عم أحمد صامد والزمن ماهدوش ...

مع العلم انه بيبيع فى اليوم بحبه قروش ...

تسأله عندك يرد الحمد لله وعمره ما قال معندوش ..

عم أحمد فيه زيه كتير ....

ناس بسيطه عايشه بضمير ...

ناس القليل فى إديها كتير ...

ناس فقيره لكن القلب جميل ..

ناس ضحكتها من قلبها ...

على كل حال حمده ربها ..

عــــــم أحمد راجل بسيط على باب الله ..

بقلـــــــــــــم: عــــــادل الشـــــــــهـــابى