مفيش في الدنيا دي إنسان
قلبه م الغرام خالي
سألت كتير في كل مكان
لاقيت حال البشر حالي
.....................................
هنا مخدوع وهنا موجوع
وهنا عيب الغرام ممنوع
وهنا ناس ياما فرحانه
عشان بينهم غرام مسموع
..................................
سهم الحب لو صابك
بيكتب صفحه في كتابك
وقلبك يبتدي يكتب
مين خانك ومين صانك
..................................
وعيب القلب في حروفه
لا بيمسح ولا ينسى
ومهما تعاتبه وتلومه
لا بيكره ولا يقسى
..................................
ولو غاب الحبيب يبكي
ويفضل عمره يستناه
ويفضل بالحروف يحكي
علي الحب اللي عاش وياه
مفيش في الدنيا دي إنسان
قلبه م الغرام خالي
ولو تسأل في مكان
ولو ترحل علي الماضي
.................................
عصام دويدار
ليست هناك تعليقات:
إرسال تعليق