{ حلم الرجوع } للشاعر ناصر حافظ

{ حلم الرجوع }

بحبك يا مالكه الروح **يا ساكنه كل وجداني

عشقتك والفؤاد المجروح** وأحزاني محاوطاني

ده انا فبعدك حزين مدبوح**ونارالفرقه طايلاني

زاد همي وطال الليل ** في غربه مره وخداني

نشف دمي وشفت الويل ** لوحدي وانتي نسياني

**حلمت برجعتي تاني**

غريب وغربتي طالت ** بأوجاعي لياليها

حزين ودمعتي سالت** ومش قادر اداريها

جروحي م الهموم زادت ** ومين غيرك يداويها

دوايا ف لمسه من إيدك** تزيل ألمي وأشجاني

**حلمت برجعتي تاني**

حلمت بقلبك الأبيض** يشيل عني حمول همي

يبددلي ليالي الخوف ** يدفيني كما أمي

حلمت بحضنك الملهوف ** يحن علي ويسمي

ولو نسيوني أحبابي ** لوحدك تبقي فاكراني

**حلمت برجعتي تاني**

حلمت ارجع وادق الباب ** وبالبسمه تلاقيني

ووسط الأهل والأصحاب ** في أحضانك تضميني

تنسيني ألم بعدي ** وبالفرحه تهنيني

اتاري حضنك الكداب ** نسي أحلامي ونسيني

حفرت اسمك انا ف قلبي **ومن قلبك بتمحيني

نسيت نفسي لكن فاكرك ** ومن فكرك بتنسيني

ولما ارجع الاقيكي ** ف أحلامي معانداني

ألاقي الغدر ف عنيكي **وبالحسره مقبلاني

أتاري لوعتي قربك ** وروحي تايهه بتعاني

بقيت بندم وانا جنبك ** واحن لغربتي تاني

*حلمت بغربتي تاني*

بقلم / ناصر حافظ