..مات الكلام. بقلم ...على العربى...

..مات الكلام......
خلص المشوار ياخال..
وبسكاتك مات الكلام
بعدك مين بس. هيقول
ومين..هيلبس الجلبيه والشال
ياللى ع الدكه جمعت حبايبك
وحكيت ع اللى صايب البلد وصايبك
قلت وسطيهم غنوه وموال..
هو خلص الكلام ياخال...
عدا النهار..اهو عدا..
والليل ياعمنا جالك...
فى قمر يافا كتبت..
وكان زين فيه كلامك
يادرويش..سبت المسبحه والمبخره
لمين....لمين
احكى وقولى على اللى جرالك
القبر اللى ناديته زمان
يوم..ناجى العلى ناداك
صاحبك وحبيبك من يومها
قاعد..بيستناك.
هو خلص المشوار ياخال؟
ومات الكلام من وراك؟
ياماقلت فى بهيه وخضره ويامنه
ولبست كل واحده منهم خلخال
رايح فين ياغالى وسايبنا..
ياللى كنت كل حبايبنا
وهنبقى بعدك على ده الحال؟
كنت استنى حتى لحد شوال
هو جد خلص المشوار ياخال
ونشفت الميه م الزرعه؟
مين هيروى..دى عاوزه ساقيه
والساقيه بعدك..يعنى باقيه؟؟
ولا اقولك..سيبلنا حتى بدال
نروى بيها جوانا اللى زرعته
بالحب فينا قسمته..ااااه يمايا
ولدك يمايا..قسى قلبه
ساب الكل حزنان عليه..
ياسلام..مين كان يمشى جنبه
هو صحيح يمايا مات؟
ولا حلم..ونايم على جنبه
طب حطى يدك على صدره
شوفيه طالع ولا نازل.
قربى خدك على نفسه..
شوفيه سخن ولا بارد..
شوفيه صاحى ولا ساكت..
يااااااه هو خلص المشوار ياخال
سبحان مغير الاحوال...
...على العربى...