**اركب حصان الحب** بقلم الشاعر وحيد راغب عضو اتحاد كتاب مصر**

اركب حصان الحب
مد اديك
وامسك ف حلمك أى همسة
بتناديك
واخلعها من شوكة اللى كان
والذى
وفتح لها غلق الكمايم
وانده لها شمسة ابتدى
ليها المخاض
وان العمايم
لازم تحرك عرفها
شطر المصب
ويكون ف علم بينقرى
ان الموج بيقلب زى عادته
وان الغريق عمره ماقب
ما تمدلوش قبل الايدين
عيون بتبحث عن حياة
عمره ما يحلم بالنجاة
فدان شموع مالوش فى ليل
محروق بدمع الوسوسة
ونفوس بتعزف على الغريب
والشاذ
وحوشى مصباح المنير
والفسفسة
مبدأ حياتها تشوف النملة فيل
والشامة سمرة ف خد وردى
جبال تهامة
وعصير الحب الابيض
أسود
من ليل الندامة
والاستقامة
حروف بتدبح ف النخيل
وشموس بتغرق ف الأصيل
وان الطويل
شايفاه قصير زى قزم
وكمان نحيل
والحلو ملح ع اللسان
وكأنه ميتم من زمان
متأجرة فيه النساء
لشق الجيوب والملطمة
وثبور وويل
م المستحيل
تخلى النهر يجرى ف العقول
من غير دليل
اركب حصان الحب
والجم رياح الندب
واعلق اشارة فى كل حارة
أو لوحة طريق
بين كل بحر أو محيط
لازم مضيق
مفيش غيامة تخبى شمس
ولا فيه نجاح
من غير فريق
عشان تكون قبطان بجد
أو طيار بيحلق للرياح
اعرف خرايطك زى اسمك
ومطبات النواح
وادرس النوة اللى فاتت
واللى جاية
ومين ورا الصخرة الشقية
ومين بيلبس وقت غفلة
ليل ما يعرفشى النجوم
عمال بعمق ف الخلاف
وفروع بتكتر
من هنا أو من هناك
ع المستقيم
إمسك قمر
واخلع عنين الضلمة يمكن
تزرعه
هيه الزهور لو يحرقوها
تشم ايه
غير عطر يفرح ف القلوب
الدنيا صحوة بتندهك
وجمال وطيب
ليه الرفادة والسقاية
تبقى عبء
ونور بغيب
الدنيا ساعة للى فايق
مش لساكر بالحروب
الدنيا لحظة حب ساكنة
ف القلوب
متخلهاش شك وخلاف
لو شالوا حتى ف ليل شتاك
عنك لحاف
إنت لو مليون بشر
إنت آدم
إنت حوا
جنس إيه
شكل إيه
إنت مخلوق الإله
معادلة واحدة ف الوجود
احشد حشودك ما تلقيش
لو لويتها بألف يد
إنها أبدا تحيد

الشاعر وحيد راغب عضو اتحاد كتاب مصر