( شَـمعِـة رَمَضــــان ) كلمات الطبيب الشاعِر المصرى د / محمد رزق

*** شَـمعِـة رَمَضــــان ***

أهلاً رمضان مليون مَرحَب

قرآن وأدان ، فـَجر ومَغرِب
وصَلاه وصيام وبنِـتـدَرَّب
على حُب الخير ياللا نجَرَّب
نِرضِى الرَّحمَـن مِنـُّه نِقـَرَّب
ياللاَّ ياإنسان بَطـَّـل تِهـرََب
***
باب الغـُفران مَـفـتوح ياللاَّ
تِروى العَطشان مِليون قـُلـَّه
يرجَع شـَبعان بَعد ماحَلـَّى
بالنور مَليان ألف ماشاالله
مايخاف حِرمان والخوف وَلـَّى
ياللا ياإنسان كَلـُّه عَلـَى الله
***
ذنبك مَغفور ، حَـسَـنات يامَا
مليان بالنور ألف عَـلامه
مَرسومة عليك زَىِّ الشامَه
أمَّا الكسلان ألف نـَدامَه
يلقـَى الحِرمان فِـى الدَّوَّامه
وان كُنت مَريض ألف سلامَة
***
تِـفطـَر وتعِيد رَبَّك عالِـم
بالقـَلب ؛ عَليه هُوَّا الحاكِـم
رَمَضان بيقول : إصحَى يانايم
أيَّام بـِتفوت ولاشِئ دايم
غِير المَعروف والخير لازم
إصبُر هَتشوف نـَفسَك عايم
***
فى السعد وكل اللى تريدُه
رَبَّـك مَسـؤل يرضِى عَبيدُه
والخير بـيـبارك ويزيدُه
والشر بيقطـَع عَـناقِيدُه
ياللا ياأحباب صَلـُّوا وقِيدوا
شـَمعِة رمضان ، فـَرحِة عيدُه
***
**
*

خالص محبتى واحترامى لكم جميعاً

وكل عام أنتم بخير وسعادة ويمن وبركة بإذن الله

الطبيب الشاعر المصرى/ د. محمد رزق