واحدة واحدة
السحابة جاية يا اما
والمهمة اللى ف إيدينا
هاتنتهى
والمطر
فوق كل خد ها ينطلق
ما هاينحسر
والشقوق اللى ف عنيك
هتتملى زرع ورود
والغنا اللى ف شفايفك
تتلقيه فوق كل عود
واحدة واحدة
الشباك مليانة خير
والفقير راح راسه تعلى
كالأمير
والصغير من كتر شمسك
تلقى فيه مليون كبير
والبنات الحلوة تمشى
بالدلال
المحال كسرنا عضمه
والقنال بيقول كتير
احنا فتحنا المصير
يا ابن رشد قوم تعالى
احنا ما بطلنا نحلم
احنا حولنا التعاسة
لضحكة عالية كالبدور
خلى حقد الخيبة تبكى
إننا زى البكور
مستحيل الليل يزيحه
عن طلوعه
مستحيل الخسة تقلع
جذر ثابت من ربوعه
واحدة واحدة
واللى هاجر راح يعود
واللى ماصص ف اللمون
هيقول نشيد
والرعاشة ف الايدين
تلقى المحبة مثباتها
باليقين
إننا شعب بحضارة
مش شهادة لفقوها
واستمارة
واحدة واحدة
والكواكب من سماها
راح تبارك
وافتتاح الدنيا يا امه
كله زاحف جاى يشارك
الدموع السخنة جفت
وابتسامتك حب جامح
مش معارك
الربيع هاينام ف شطك
والخريف هانقوله
بارك
الشاعر وحيد راغب
عضو اتحاد كتاب مصر
ليست هناك تعليقات:
إرسال تعليق