نصحونى اكتب
فى بحور الشعر
كتبت باشعارى
اغانى
----------
غرقت يا ناس
من اول بحر
وغرقت منى
اوزانى
--------
اصل ده فاعل
وكمان فيه كسر
ضلعى انكسر
الجوانى
------------
ما عرفتش اعوم
وفى اول شطر
غرقت ما حدش
نجانى
----------
رجعت اكتب
من اول سطر
ضربنى العم
الوردانى
-----------
يا اخوانا
انا هاوى بخاف م البحر
وهاشكى
لخالتى ام تهانى
------------------
لو ناقد
انقد من غير جرح
من اليوم
راح اعمل فكهانى
------------------------
وهابيع الفجل
مع الجرجير
وهاقول على نفسى العم جرير
لك شوق تانى
-----------------
لك بحر يا اخويا
انا عندى محيط
ما انا برضة حويط
دا البحر فى دمى وربانى
----------------------------------
ميته مالحة
ومليانه فيتامين
مع عم امين
نسهر ونقول
احلى اغانى
-------------------
ما قلت يا عم
بلاش تمثيل
لو حرفى جميل
اعمل لايك
مش عاجبك
ليه تجهد نفسك علشانى
--------------------------------
انا هاوى
يا عم بقى انسانى
انا بامشى
يا دوب
على شط النهر
وبحرك ياأأأه ... عالم تانى
ليست هناك تعليقات:
إرسال تعليق