( ندم مرفوض )
**********
راجعه تقولي انك ندمانه # وبتداري دمعك ورا ايدك
حاسه كمان انك غلطانه # طيرتي ورقي بتنهيدك
ندمك مش هيعيد الفرح # ودمعك كداب مش هيفيدك
حزنك مش هيداوي الجرح # ومهما يكون خدك علي إيدك
مش راح يرجع حبي معاكي # ولا عمر قضيتو وياكي
ده انا ضيعت سنين من عمري # راحت مني هدر ف هواكي
وياريتك قَدَرتي وصنتي # وحفظتي حلمي جواكي
لكنك جرحتي وخنتي # وزودتي جرحي بدواكي
انا مش هسلم للخداع # اللي شايفو ف كل دمعه
قلبك اختار الوداع # وقلبي بكي وكنتي سامعه
لسه فاكر كان يوم خميس # كان ليل وصابح بعده جمعه
كات كل أحلامي كوابيس # وليلي ما كسرت ضلامو شمعه
وعايزاني أغفر وأسامح # وراسمه الحزن كلام وملامح
عايزه بعد قساوتك ليا # ترجع بسمتنا ونتصالح
عايزه العصفور يفرد وشو # بعد وليفو ما ينكش عشو
ويسيبو مع الخوف وحداني # لأي غراب أو بومه تهشو
لو صلحتي قزاز اتكسر # وللميت رجعتي الروح
لو بيكي الحلم بيتفسر # والصعب ف قربك مسموح
مش راح تفتحي قلب اتسكر # ولا هتداوي حبيب مجروح
مش راح احن لحبك تاني # مهما تقاسي ومهما تعاني
قلبي نسيكي خلاص وارتاح # ودفن ف ترابك أحزاني
***************
بقلم / ناصر حافظ
ليست هناك تعليقات:
إرسال تعليق