(يا صاحبى)
ياصاحبى ليه تفترى
وتبدّل المكتوب
للندل ليه تشترى
مع انه كلو ذنوب
الدنيا ورتنى ياما
فى البشر اشكال
على كل لون تلتقى
وكل صنف له توب
فيه اللى توبو مرقع
كل ساعه فى حال
وفيه اللى توبو مجرجر
يلم عفش وطوب
وفيه اللى توبو يغنى
مع النسيم موال
وفيه اللى توبو حرير
من شكّه بيدوب دوب
وفيه اللى باين نضيف
لابس التوب مقلوب
واهى دنيا دانيه
بعبرها كلها امثال
والاصل بالفعل
مش بالشهره والمكتوب
الصخر ثابت
وما بتغيّرو الاحوال
والعفش طاير
وسايقو الريح معاه بيجوب
لكن ياصاحبى
قول الحق ولا تخافشى
ولا تهتم عمرك
ب ابو ضمير معيوب
******
عبدالله ابو النجا
ليست هناك تعليقات:
إرسال تعليق