مين أنا ؟
بقلم تامر النقيب
_________
مين أنا ؟
نفسي أعرف أبقي مين ؟
أنا وشعري وكل دفاترى
وأقلامي بقينا مساكين
بنتحايل على الدنيا
وع العيشه
وع الحب اللي حبيته
بقالي سنين
بحس بغربه قتلاني
واحس بدنيا كرهاني
وبستني أشوف فرحه
ولحظه حب ترجعلي
ونفسي أصرخ
بلاقي نفسي منعاني
وتملي حزين
حد يقولي مين أنا ؟
نفسي أعرف أبقي مين ؟
بقيت تايه
وماشي وسكتي ضلمه
تملي لوحدى أنا عايش
برغم الصحبه واللمه
بحس بغربه ليه دايما
وأحس بخنقتي يمه
بقيت مليان ألم وأنين
طب مين أنا ؟
نفسي أعرف أبقى مين ؟
نفسي أفهم ليه حياتي مشقلبه ؟
ليه بحس جوه مني بكركبه ؟
ليه بحب بكل صدق
وليه يكون جزائي صد
وأما أسأل مين أنا
ما بلاقي رد
هو ليه من يوم ميلادى
مبشوفش غير حرمان ونار
هو ليه أزرع بياضي
تطلع الزرعه سمار
وأما أحب بتوجع
والحب عني بيتمنع
طب هو قدرى
ولا ده م اﻹختيار
ولا هى خلاص رمتني
وبُعدها عني قرار
ولا أنا أصلا عبيط
ولا مكتوب ع الجبين
ياناس قولولي مين أنا ؟
نفسي أعرف أبقي مين ؟
بحب الناس
وليه بينهم تملي غريب
وتاه الكل عن جرحي
صديق وحبيب
بناديهم ولا سامعين
وشاريهم
وليه بايعين
وبكتبهم حروف شعري
يقولوا كفايه مش عاوزين
خلاص إنسي ليالينا
وروح عنا وخلينا
خلاص زمنك ده عدى وفات
ياريت تبعد ولا تجينا
ولا عاوزين غرام منك
ولا كلمه وشوق وحنين
روح إسأل غيرنا
مين إنت وجي منين
دة أنا تعبان
ومش عارف
راح أطلع مين
ما أنا نفسي يادنيا
أعرف أنا أبقي مين؟
بقيت بستني ضحتها
وهي ليا تتجاهل
وببني أحلام لسعادتها
لكن شكلي أنا الجاهل
يدور بالعقل الف سؤال
وفكر يغير اﻷحوال
وبكتب حزني أنا موال
وأغني ع النايات ألمي
وبسهر ليل مع الحايرين
وأسأل ليلي يا ليلي
أنا أطلع مين ؟
نفسي أعرف أبقى مين؟
زمان قالوا قطيعه الحب وسنينه
مفيهش لحظه راحه بال
وناس الحب ظالمينه
وناس بكلامها تتباهى
ويبقي عشقها رحال
سنين حرمان عادت تاني
وغلب الدنيا وداني
لناس بتقول انا الجاني
وأنا اللى بقلبه ميت سكين
وبرجع أسأل الدنيا
أنا اطلع مين ؟
نفسي أعرف أبقى مين ؟
____________________
تامر النقيب . . . . . من مؤلفاتي وليس منقولا
ليست هناك تعليقات:
إرسال تعليق