**نصيحة أمل **
***********
مالك يا صاحبي ليه حزين ***والنفس مليان أنين
ليه مسلم للسكوت
إوعي في الأحزان تغالي **دي الجروح لو صوتها عالي
الأمل له ألف صوت
لاعب الدنيا وناغشها *** بالأمل لازم تعيشها
دي الحياه ف أخرتها موت
خدها من قلبي صريحه ***بس تعمل بالنصيحه
قبل ما الايام تفوت
ليه تتوه وسط الهموم *** ليه تعاتب ليه تلوم
ليه تقلب ف اللي فات
ليه بتسرح ليه تفكر *** ليه تبوز ليه تكشر
ليه تزود في الأهات
ليه بتندم ليه تقاسي *** ليه لفرح الدنيا ناسي
ليه تعيش في الذكريات
ليه تدمع ليه بتبكي *** ليه لكل الناس بتشكي
ليه بتحزن ع اللي مات
ليه بتتعب ليه تعاني *** كل شيئ في الدنيا فاني
والإله هو اللي باقي
لو ف قلبك جرح صعب *** ادعي بس وقول يارب
بكره بالإيمان تلاقي
جتلك الأفراح جديده *** ورده بيضا ومش وحيده
نابته من وسط الشراقي
إدعي ربك ينهي كربك *** حب كل الناس تحبك
إبتسم وقت التلاقي
خلي ليك في القلب ذكري ***هي فكره اليوم وبكره
خير هتعمل خير تلاقي
ليه تفتش ع العيوب *** ليه بتظلم في القلوب
ليه توري الناس شرورك
ليه بتتباهي بفلوسك *** بكره رجل الناس تدوسك
إنسي كبرك أو غرورك
ليه بتغرق في المعاصي *** ليه تعيش والقلب عاصي
دي الذنوب بتطفي نورك
ليه لنفسك بس خيرك *** ده انت زيك زي غيرك
في الحياه مستني دورك
صاحب المحتاج وصونه *** اوعي مره ف يوم تخونه
تلقي كل الناس صحابك
انشر الفرحه بعمايلك *** اوعي تذكر يوم جمايلك
الأمل هيدق بابك
عيش حياتك يوم بيوم *** إنسي جرحك والهموم
تلقي جرح الدنيا سابك
خلي وقتك كله طاعه *** تجيلك الأحلام مطاعه
وراح تفوز في يوم حسابك
ربك التواب يعينك *** برحمته يوفق يمينك
تستلم بيها كتابك
بقلم /ناصر حافظ
ليست هناك تعليقات:
إرسال تعليق