طبــــع الحبايـــب
طبــــع الحبايـــب مليــــان عجايـــب
بيحبونا بيعشقونا وفقلوبهم الحب غايب
بيتكلموا بيرسموا بيقسموا لينا المصايب
اللي اتكلم ياما وأفعاله كشفت كدبه
واللي اتألـم ومــا لقيش حد يقف جنبه
واللي اتعلم عليه بخيانة وانجـرح قلبـه
واللي دوب قلوب ناس في حبه وهو قلبه مش دايب
تحبهــم يتكبـروا تتغير عشانهم ف بيتغيروا
يجاملوك سنين بحبك وف لحظة شك بينكروا
ع الفرقة يقدروا بيخونوا ويغدروا وع الخلق بيفتروا
دول مهما تحبهم صعب يقدروا أصل الحب ف نظرهم خيط وسايب
همـا لمـا أول مــرة يشوفــوا بعــض
يتقابلوا بحب وشوق ولهفة
شايفين نفسهم أرق اتنين ع الأرض
يخلصوا كلام العشق في وقفة
بعــد كـده خـلاص بينتهـي العـرض
ف ما يتقابلوش غير بالصدفة
ياما بنتواعـد ونتعاهــد إننا رح نفضـل علـى طـول عشـاق
يمكـن نوفــي بوعودنــا ويمكـن فــي رأي تانــي للفـــراق
طبـع فينـا نختـار اللـي مش لينــا
واللـي شارينــا بنقـول بيرمي بلاه علينا ولا رماه غير الإشتياق
طبـع الحبايـب الحـب ف قلوبهـم غايـب وعشاق زمنهم على أوراق
خالد المنصوري
22\4\2014
ليست هناك تعليقات:
إرسال تعليق