(الغربة)
السجال الذى اقيم يوم الجمعة الماضيه 22 مايو 2015
( بجروب احلى كلام )
بين عبدالله ابو النجا
والشاعرة فايزة محمود / حروف كتبها القدر
والذى استمر 50 دقيقة من العاشرة وعشر حتى الحادية عشر مساء
بعد انتهاء السجال اطلقنا عليه اسم
نتمنى ان ينال اعجابكم
(الغربة)
1..فايزة محمود
كنت بدمّع أيوه امبارح
وابعت أشواقي وبسامح
بس لقيت الردعليّا
عشقت الغربة خلاص مش راجع
***
1,,عبدالله ابو النجا
ماانتى ياحلوه كل كلامك
خلّانى اهرب من ايامك
عايزا مطالب والجيب فاضى
عشقت الغربه وليلها الجارح
***
2..فايزة محمود
كنت أنا ضلك في الضهرية
وبعزف ألحاني بحنيه
يخرب بيتها الغربة قوية
ليه قسّتك الدنيا عليّه
***
2..عبدالله ابو النجا
انا فضلت الغربه دى ليّه
عشانك انتى ياغاليه عليه
وبستحملها مرار واسيّه
وماشى فى الدنيا بعقلى السارح
***
3..فايزة محمود
كنت أنا عشقك حد امبارح
قلبى يقاسي كتير وبسامح
ما انت ملكت القلب بحبك
ليه تراسلني تقول مش راجع
***
3..عبدالله ابو النجا
يعنى بخاطرى دا غصب عنّى
انت عيزا مطالب منّى
واللى معايه ياحلوه ف جيبى
لا يرجعنى ولا يطمنى
***
4..فايزة محمود
يللا تعالى ننسى ألامنا
ونروى الحب بلحن غرامنا
نعيد الود وننسى الفرقه
وتعود لينا بهجة ايامنا
***
4..عبدالله ابو النجا
ياما انا نفسى اعيش وياكى
وارجع تانى بقرب رضاكى
واعيش حبك ونعيم قلبك
واغرق تانى فى بحر هواكى
***
5..فايزة محمود
أنت عشقت الغربة سنين
وانا منتظرة بشوق وحنين
عذبتنى بسهر وأنين
روح بقا عنّى ماعايزا كلامك
***
5..عبدالله ابو النجا
هو دا بردو ياغاليه كلامك
ياما قاسيت وشقيت علشانك
بعد الغربه القاسيا عليّه
يبقى جزاتى ياغاليه خصامك
***
6..فايزة محمود
انا مقدرش اخاصمك عمرى
لكن هو عتاب من قلبى
اسمع منى وصدق حبى
انا شرايينى بتنبض بيك
***
6..عبدالله ابو النجا
وانا ازاى على بعدك اقدر
لكن هى ظروف مش اكتر
شفتى ازى الحوجه بتجبر
وانتى لروحى وقلبى شريك
***
7..فايزة محمود
أنا مش عايزة فلوس وهدوم
عايزاك انت تكون لي النور
افتح عيني عليك من النوم
لو عيش حاف هيكون لي سرور
**
7..عبدالله ابو النجا
وانا راح انهى الغربه واجيلك
واعيش ليكى وارد جميلك
مين يقدر عالبعد فى ليلك
د انتى لقلبى بدر بدور
***
8..فايزة محمود
أنا فرشالك أرضي زهور
منتظراك بعطور وبخور
إن مقدرتش ترجع لية
أنا هعبرلك سبع بحور
***
8,,عبدالله ابو النجا
وازاى اقدر تانى على بعدك
بعد ماشفت دا كلو فى قلبك
انتظرينى ياحبيبتى انا جيلك
نملا الدنيا بحبنا نوور
*********
ليست هناك تعليقات:
إرسال تعليق