ورقة بردي
.............
حسيتني معاك ..
وكأني يادوب ورقة بردي
وانت الكاتب
وانت الخطّاط
وانت الفنان
إرسمني وجمّل ف الألوان
إرسمني بلاد
وجبال وهضاب
إرسمني سحاب وجناين ورد
إرسمني حدود ملكك وحدك
خليني سماك لو كُنت الأرض
إبنيني معابد حضنه ف بعض
طبطب على كل مكان فيّا
وحذاري المعبد يوم يتهد
إرسمني وعيد تكويني بجد
إرسمني رموز
لخرايط كنز ف رُكن بعييد
حُرّاسه الجان
إرسمني كمان
إسطورة حُب وشوق وحنين
وكأني معاك أول تكوين
إكتبني حروف لُغتك وحدك
وطلاسم محتاجة لتعاويذ
إرسمني إيزيس
وافردلي دراعك يحضنّي
خليك أوزوريس
أنا وانت ف قلب السما فوانيس
بنوزع ضي على العُشّاق
ونلم نجوم
وبشوفك كل ما اقوم م النوم
ماسك نجمايه بتطحنها
وتعبّي المِروّد على إيدك
وتجيني تكحّل ف عيوني
شايفاك بتزغزغ أحاسيسي
وبعطرك بتصحّي جنوني
أتجن معاك
وادخل جواك
ألاقيني بقيت ورقة بردي
مرسومه بكل خطوط الشوق
وانت ..
مخبيها ف قلب الروح
.............................
من ديوان
(خبيني فيك)
ريــــــــــــــــ صلاح ـــــــــــــــــم
رووووعة
ردحذف