مِحْلِبنا ليل ونهار
بيغَنِّىِ بالإنْجاز
طَبْ هوا فين يا حليم
دِىِ جيوبنا جابِت جاز
كيلو الطماطِم وَصَل
ف السوق ثمانيَه جنيه
والفاكهَه مُش هانقول
فيتامينها شيئ مِتْعاز
واللَّحْمَه ف الاسْواق
مش لاقيَه حَدّ يشيل
لجْل انّ من سِعْرها
صاب البَشَر إعْجاز
واللِّىِ يزُور جَزَّار
دِلْوقتِ عنْدُه يرُوُح
بالليل عَشان بيْخاف
لَتْصيبُه عين هَمَّاز
وامَّا يرُوُح البيت
ناقِص يقول يا وْلاد
ما تحُطُّوهاش عَ النار
حُطُّوها ف البِرْواز
والباميَه طُعْم الغَجَر
دِلْوقتِ شوفها بكام
والثُوم وسِعْر البَصَل
والكَهْربا والغاز
ويومِيِّة المَطْحون
ف الشَمْس طول اليوم
مُش كافيَه لجل تجيب
اللُّقْمَه مِ الخَبَّاز
والباشا (مِحْلِب بيه)
وحكومتُه زيد وعبيد
واجِعين دِماغ الناس
ب قَصيدِة الإنْجاز
بالزمه فى انجاز
بيزود الموجوع
فوق الوجع اوجاع ؟؟
ماتفهموا الاستاذ
بقلم / عبدالله السعيد
ليست هناك تعليقات:
إرسال تعليق